Det vert diverre ikkje noko av klassa for landslag under årets jubileumsturnering. Etter hundrevis av telefonsamtalar, SMS og mailar, må cupgeneral Roald Flodsand kasta inn handkleet. Alt på våren 2017 starta Roald med å invitera fem landslag, og dette såg lenge ut til å gå i boks. Etter kvart som tida gjekk og cupen nærma seg, kom det fleire avbod, og då måtte planane skrinleggjast. Kanskje det kan gjennomførast ein annan gong? I alle fall skal Roald ha all honnør for ide, innsats og stå-på-vilje for dette med landslag til Veterancup.

Uansett så blir det som vanleg ei triveleg helg i Lærdal med god innsats på parkett og bankett (og puben med).

 

Lars Einar Torsnes

Dersom nokon av vinnarlaga tok vandrepokalen med seg heim etter førre turnering, MÅ dei hugsa å ta pokalen med tilbake til Lærdal no i 2018.

 

Lars Einar Torsnes

Sogndal er sjølvsagt mellom dei klubbane som deltek i Veterancup år etter år. I 2018 stiller dei tre herrelag og eitt damelag. Me har prata med to av superveternane, Lasse Opseth og Petter Melchior. Desse to karane herja med motstandarane på 80-talet. I seinare år har dei brukt fotballkreftene i indre Sogn midtvinters.

Duoen fortel at det av ymse grunnar blir lite felles trening. Dei satsar på at talent og rutine kan vega opp noko og at god oppvarming gir mindre strekkfare. Dei går for å vinna på banen, men kulturseansen laurdag ettermiddag på Lærdalsøren Hotell & Pub er eit godt plaster på såret om ein skulle ryka ut.

Petter fortel at gjengen plar samlast 1-2 gonger årleg til sosialt samver i tillegg til Veterancup. Dei har mellom anna bak seg ei samling på Atle Torvanger si hytte i Bremanger. Atle blei alvorleg sjuk hausten 2016 og er no under fysisk rehabilitering og opptrening. Bergens Tidende hadde for øvrig to artiklar no føre jul om Atle Torvanger. Sjekk bt.no

Lasse fortel elles at det er kjende fjes som dukkar opp på laget deira. Eit par kort er usikre, men alt i alt er det ein rutinert gjeng i sin beste alder som er klar for Veterancup 2018. Velkomne til cup!

 

Lars Einar Torsnes

 

Jondal IL frå Hardanger er i år med for 17. gong. Me har snakka med primus motor Atle Sollesnes.

Atle seier at dei stort sett har hatt ei fast stamme på 6-7 spelarar. Dette er karar som er fødde ca 1970, og dei spelte saman som gute- og juniorspelarar. Underteikna hugsar godt desse gode juniorårgangane som gjorde det godt i lokale seriar og i Norway Cup på slutten av 80-talet. Utover i veterancupsoga har nokre kome til medan andre har gått av med pensjon. Den «største» overgangen har vel vore keeper Bjarte Eikeland til Brann. Bjarte vann skinnstolen frå Stordal som cupens beste spelar i 2017, og han har ei aktiv fortid i Brann som seniorspelar. Dei har også ein langpendlar på laget i Jan Inge Eide som er busett nær Malmø.

Atle melder at det er den vanlege gjengen (stort sett) som er med også i 2018. Dei trenar lite saman, så talent og rutine vert viktige element. Nokre spelarar er skada, mellom andre Atle sjølv. Han øydela kneet under ein fotballkamp (!) i november og må eventuelt delta som coach i verdensklasse. Jondal kjem uansett til å markera seg, anten i sluttspelet eller på puben.

Velkomne til cup!

Lars Einar Torsnes