Bakke rosar tiltaket

Eirik Bakke tykkjer det er flott at det blir sett fokus på situasjonen i Ukraina i samband med veteranturneringa.

– Både konserten og kampar mot lag frå Ukraina er flotte tiltak. Eg vonar dei lukkast med å laga ei god ramme rundt dette og at me får fokus på det som skjer i Ukraina, seier Bakke.

Den tidlegare Leeds-proffen legg til at dei gjennom dette får utvida fokus og merksemd mot folk som ikkje har det så godt.

– Her kan dei få eit pusterom. Me spelar mot kvarandre og det syner at fotballen går vidare uansett, samstundes som me får synt litt solidaritet i praksis. Så blir det også samla inn pengar til humanitære tilhøve i Ukraina. Flott tiltak av Flodsand, det er litt i han si ånd.

Bakke skal representera landslaget under turneringa denne gong, saman med blant andre Steffen Iversen, John Arne Riise, og Frode Grodås. Han kjem seg ikkje til Lærdal før laurdag, då han er på jobb for Viasat fredag som ekspertkommentator i FA-cupoppgjeret mellom Arsenal og Manchester City.

– Men eg tek fyrste fly tilbake frå Oslo laurdag morgonog satsar på å yta maksimalt i kampane laurdag. Dei andre spelarane er sikkert også litt slitne etter to kampar og ein kveld i Lærdal fredag. Så det kan vera greitt å ha litt friske bein utpå der då.

Tekst: Jan Egil Fimreite