Frå Vicente Calderon til Lærdalshallen

Ein mimrekveld på Kniksenpuben i september førde til at Fyllingen snekra saman eit lag til veteranturneringa i Lærdal.

Det er ikkje kva lag som helst, i september var det 30 år sidan Fyllingen møtte Atletico Madrid i Europa-cupen.

– Alle spelarane som kjem til turneringa med Fyllingen, var med på denne kampen, seier Asbjørn Helgeland, sentral i laget som tok seg til Europa-cupen.

Det vart rett nok tap både på Brann stadion (0-1) og på ærverdige Vicente Calderon (7-2). Men opplevinga var absolutt verd ei markering 30 år etter. Og det var på mimrekvelden forslaget kom.

– Det var Tor Vikenes som føreslo at me skulle stilla lag i veterancupen. Så på papiret har me eit slagkraftig lag. Kor sprekt det er, står att å sjå.

Helgeland var på laget i Fyllingen sin glansperiode frå 1990-93. Han fekk difor med seg cup-finalen mot Rosenborg i 1990. Der vart det rett nok eit solid 5-1 tap, men Fyllingen var i det gode selskap.

– Det var kjekkare å slå Brann 2-0 i semifinalen, minnest Helgeland.

Helgeland har vore i veterancupen tidlegare, då med Haugesund. Dei har reist heim att med gull i bagasjen to gonger. Helgeland ser fram til å ta del i veterancupen nok ein gong, men no altså med Fyllingen.

– Det er eit strålande opplegg som Roald og kompani har stelt i stand. No er det ei stund sidan me har vore der og eg vonar det blr mogleg å avvikla i januar. Det er alltid kjekt å møta tidlegare med- og motspelarar. Då er det ikkje vanskeleg å få praten i gang. Nei dette er eit kjempetiltak, så me vonar smittesituasjonen er slik at turneringa går som planlagd, seier Helgeland, som kan sjå tilbake på ei karriere på tennisbana som vestlandsmeister i sin årsklasse.

– Då eg var ferdig med fotballen, tok eg opp tennisen. Det bidreg til at eg held meg i brukbar form.