Kjekt å møta gamle kjende

– Fotballverda er lita og det er kjekt å møta gamle kjende på denne måten.

Hannes Sigurdsson stiller for det islandske landslaget under veterancupen i 2022. Det gjorde han også første gong han deltok på turneringa for to år sidan.

– Det er kjempekult, både det å treffa att gamle lagkameratar og landskampmotstandarar.

I Tyskland

Sigurdsson er i dag trenar og manager for den tyske klubben FC Deisenhofen på nivå fem. Her i Noreg er Sigurdsson best kjend som Viking-spelar i to periodar, men han har også vore innom klubbar som Stoke, Brøndby og Sundsvall i si lange karriere. Han har også 13 kampar for det islandske landslaget.

Godt gjort

Sigurdsson tykkjer det er kjekt at ein litan stad i Sogn kan få til ei turnering som veterancupen.
– Her kjem me oss vekk litt, i tillegg er naturen heilt sjuk i Lærdal og regionen, seier Sigurdsson, som ser fram mot turneringa.
– Stemninga i hallen er veldig bra, så eg gler meg. Som sagt, både for å møta gamle lagkameratar og spelarar frå andre lag.

Enormt

I tillegg til det fotballmessige, tykkjer Sigurdsson at arrangørane har fått det til også på det sosiale området.
– Det heile er først og fremst ein kjempeidè, måten arrangørane gjennomfører på er det berre å skryta av. Organisasjonen gjer ein utruleg bra jobb.