På toppen av Veterancup sin adelskalendar for damer, finn me Kaupanger!

Fylkeslaget til VeteranCup og pionerane innan damefotball lokalt, kjem altså frå den vesle bygda Kaupanger.

I dag 22.november har ei av damene med lengst fartstid, bursdag! Etter tips frå lagveninner, regnar me med at dagen blir feira med fotball og ei iskald cola; Gratulera så mykje med dagen Rut Furebotn Loftesnes!

Medan fleire av damene frå det første veterancup-laget deira, har lagt skoa på hylla. Består likevel kjernen hjå SuperVD av spelarar frå 2002-laget! Rut og Britt Leni Berge er to som framleis er med for fullt.

Britt Leni kom til Kaupanger for å spele fotball i si tid. Her fann ho også sin utkåra, og tok han lik så godt med heim til Florø, etter fleire gode år i Kaupanger.

Sjølv om mange spelarar flyttar «heim» etter ei tid i Kaupanger, er bånda lagveninnene knyter, både varige og sterke. Minst ein gang i året, møtes gjengen igjen til ulike sosiale treff. Mellom anna under VeteranCup i Lærdal, kor også fotballskoa blir pakka med i bagen.

Britt Leni, du er ein av «kjernen» – korleis har det seg at laget har same «kjerne» på Veterancup i 2022 som i 2002?

– Godt og inkluderande miljø, flinke til å samlast innimellom sjølv om ikkje alle bur i Kaupanger og Sogndal lenger. vi har det veldig kjekt i lag.

Korleis klarer ei lita bygd som Kaupanger å stadig hevde seg innan damefotball?

– Sjølv om Kaupanger er ei lita bygd så har dei vore flinke på å hente talent frå heile fylket, og det at ein kombinerer fotball med utdanning i nærheten er også ein fordel. Sjølv om det er ein liten klubb, driven på dugnad så har tidlegare spelarer og folk i bygda vore flinke å stille opp, damene er blitt tatt på alvor, og det er blitt lagt til rette til gode treningsfasilitetar.
Eg har hatt ei veldig fin tid med Kaupanger og set veldig pris på det sosiale vi har i lag, dei er flinke til å inkludere. Ein av dei tinga eg sit igjen med frå gamledager er at eg følte at foreldre og bygdefolk tok så godt vare på oss. Eg snakkar fremdeles med dei når eg treff dei i Kaupanger – det er ei bygd med stort hjerte.

Du var ein av dei som kom til bygda for å studere og for å spele fotball – kva hadde det å sei for deg då, og for vegen vidare?

– Eg spelte i Kaupanger i 3 år og knytta vennskap for livet. Eg hadde ei kjempefin tid både sosialt og fotballmessig desse åra. eg fortsatte ikkje med fotball på samme nivå etter Kaupanger men tilbake i Florø har eg vore med å spele aktivt litt til og frå i nesten 25 år. Første åra var eg også med som spelande trenar for damelaget og som sonetrenar.

Du har jo også spela på Sandviken – kjenner du på litt ekstra konkurranseinstinkt når kampen mot dei skal kjempast, eller har ting endra seg no når ein er blitt «voksen»?

– Eg har jo også litt av hjerte mitt i Sandviken og blei veldig imponert når dei i år tok seriegull. Eg går enno på bana for å vinne og synes det er ekstra kjekt å spele mot Sandviken, dei er fine folk. kjenner litt på gammalt konkurranseinstinkt då, men det går greit å tape så lenge ein er fornøgd med spelet, så det har nok forandra seg litt med alderen 😀’

Kva tenker du om at Kaupanger no går inn i «ny drakt» bokstaveleg tala, ved å bli FK Sogndal, og byter ut #grønadrakti?

– Kjenner litt tristhet over at ein epoke er «over» men tida forandra seg, verden går framover og vi må vise endringsvilje. Eg trur at det i lang tid har vore utfordrande å rekruttere og beholde damespelarar i gamlefylket, tidene forandra seg og fotballen blir meir profesjonalisert. det blir spennande framover og eg trur at når ein kan dra nytte at Sogndal sitt profesjonelle apparat, trenarkompetanse, fysio, markedsføring o.l så kan det gi eit løft til damefotballen. Eg håpar at ein ikkje mister fokus på satsinga og interessa rundt damene, og passar på at det ikkje kjem i skyggen av herrane.

Har det noko å seie for klubbkjensla når du entrar parketten i Lærdal?

– Eg er glad og stolt av å få spele på Kaupanger – det blir ekstra stas å ta fram att den grøne drakta i år!

Takk for praten Britt Leni! Me ynskjer velkommen og lykke til på VeteranCup 2022!

Sjølv ikkje eit par hofteoperasjonar skal hindra superspissen Tore Andre Flo i å delta i veterancupen 2022.

– Eg har lyst og vil bli med dersom eg har høve til det. Eg har ikkje hatt tid og sett på kalendaren eller drøfta med familien om me har andre planar. Men er eg ledig, så kjem eg til Lærdal, eg satsar på det, seier Flo på telefon frå Gardermoen, på veg tilbake til Chelsea etter kontraktssignering i Sogndal.

48-åringen har ei eventyrleg karriere bak seg og er gjennom tidene ein av landets beste fotballspelarar. Han var sentral på landslaget i ein ti-årsperiode frå 1994. Kven har vel gløymd tunnel og skåring mot Brasil i fotball-VM i 1998, der Noreg vannn 2-1 i avgjerande kamp. Flo skåra og skaffa straffen etter han vart riven ned i feltet.

I si aktive karriere representerte han klubbar som Sogndal, Tromsø, Brann, Chelsea, Rangers, Sunderland, Siena, Vålerenga og Leeds.

Han er for tida spelarutviklar i Chelsea, akkurat no med lånespelarar som han vidareutviklar saman med klubbane dei reiser til.

Flo seier han har lyst å få med seg veteranturneringa, der han vil spela for landslaget.

– Det skal bli kjekt å møta gamle kjenningar og eg har snakka med fleire som skal bli med. Eg har høyrt at Harald Aabrekk skal vera trenaren og Håvard Flo seier han gler seg mykje. Så dette blir artig. Det blir ei artig helg med artig fotball. Kanskje ikkje så god fotball, men dette ser me. Ikkje minst er det sosialt artig, både under turneringa og på kvelden.

Han legg til at når han tek på seg drakta, då blir det uansett alvor.
– Ja, det blir ikkje skikkeleg artig om det ikkje ligg litt alvor i det. Det er ingen som likar å tapa.

Sjølv om Flo ikkje har vore med i Veterancupen tidlegare, så er han ikkje ukjend med slike turneringar.

– Eg har vore med Chelsea i slike turneringar både i Asia og USA, det er som sagt veldig artig.

Flo vil ikkje kalla seg skadefri og trur heller ikkje han nokon gong ville kunna seia det om seg sjølv. Han har skifta begge hoftene to gonger, så han har vore gjennom fire operasjonar etter at dei to første var mindre vellukka.
– Men eg er smertefri, siste operasjonen ser ut til å halda det meste på plass.

Petter Vaagan Moen debuterer i Veterancupen.  Hamkamspelaren, som tidleg i karriera lokalt vart kalla for Mjøsas Beckham, gledar seg stort til å møte gamle fotballvener både på og utanfor bana.

– Eg har høyrt mykje positivt om cupen i Lærdal. Ikkje minst blir det fint å treffe att gjengen frå den tida eg var i Brann. Ein klubb som på mange måtar var med å forme meg til den eg er i dag, seier Vaagan Moen.

Proff i England

Petter starta karriera i Hamkam, og spelte vidare i Brann, Queens Park Rangers, Strømsgodset og Lillestrøm.

– Tida i QPR var lærerik på mange måtar, men og ei tøff livserfaring. På ein måte «survival of the fittest». Eg kom til ein klubb i kaos. Det var tøft å lukkast, og reint mentalt var eg nok ikkje klar for det, seier han.

Bra lag

 Hamkam kjem til Veterancupen med eit godt lag, der Petter Vaagan Moen og Torstein Helstad nok er dei mest profilerte.

– Eg meiner me har eit godt lag,  men det er det sikkert mange andre som og har. Me skal i alle fall gjere vårt beste, seier Vaagan Moen. Han la opp som toppspelar i 2019, men har sidan hatt nok å henge fingrane. I alle fall på heimebane.

– Ja, eg og sambuaren min fekk tvillingar for 18 månader sidan, så det er mykje å drive med på den fronten, men sjølvsagt veldig, veldig kjekt, avsluttar Petter Vaagan Moen.

I tillegg til mange kampar for ulike klubblag, spelte hedmarkingen 18 kampar for U-landslaget og 9 kampar for A-landslaget.

Steinar Kvigne

Direktør ved Lærdal hotell, Ole Kristian Nedberge, ser fram til å ta i mot fotballveteranene i slutten av januar neste år.

-Det blir veldig kjekt å treffe både gamle og nye spelarar etter to år med trasig corona, seier han.

Sett vekk frå fyrste året, har Lærdal hotell kvart år hatt ansvaret for banketten i samband med Veterancupen. Og talet har auka mykj sidan starten på 90-talet.

Fyrste året var det vel om lag 100 til bords, men på det meste har me hatt bortimot 450.

– Det er klart dette har vore krevjande. For å få kabalen til å gå opp treng me mykje arbeidskraft i løpet av ei helg, seier Ole Kristian. Han er likevel klar på at sjølv om det ha vore mykje å halde styr på, så har det og vore svært kjekt.

-Ja for all del, mange gode minner, og svært mange hyggelege og takknemlege folk, seier han.

Kapasitet

På grunn av pågåande ombygging, mindre lagerkapasitet og påfølgjande planlagt ombygging ved hotellet er kapasiteten i år mindre. Det er difor sett eit tak på 240 personar som får bu på hotellet og delta på bankettmiddagen i samband med Veterancupen sist helga i januar neste år.

Steinar Kvigne