Vinnarane av årets turnering er…

Internasjonal veteranfotball

– svensk siger i veteranfotballturnering

Verken fjorårsvinnar Ham-Kam eller Rosenborg kunne hindre det svenske veteranlaget Samsung Digitall (bilete under) i å gå til topps i veteranklassen i fotballturneringa i Lærdal og Årdal. I finalen var det duka for eit tett oppgjer mot Vard frå Haugesund. Desse to laga hadde utmerka seg som dei beste gjennom heile turneringa. På Samsung Digitall spela mellom andre den tidlegare Sogndaleleganten Rhonny Nilsson. På Vard utmerka både Asbjørn Helgeland og brødrene Risanger seg. Begge lag kunne syne fram lekre fotballdetaljar, men til slutt var det dei svenske gjestane som synte seg sterkast. Vålerenga har vore trufast gjest i turneringa og i år fekk dei endeleg utteljing ved å bli nummer tre.

Vinnarlaget i veteranklassa Samsung Digitall

Rosenborg stilte også med eit sterkt lag i oldboysklassa og alle rekna nok med at Mini og Kåre ”Bruttern” Ingebrigtsen skulle ta heim sigeren. Men Eikefjorden med ein Steinar Hopen i kalasform sette ein effektiv stoppar for det. Steinar Hopen fekk heilt fortent bestemannsprisen for sin innsats på bana (bilete under).

Turneringas beste spelar Steinar Hopen (t.h.) mottek premie frå Torstein Kvam

I år som ved tidlegare høve vart arrangementet avrunda med bankett i Lærdal, der dei faste dommarane Ivar Fredriksen, Frank Skadal, Henry Øberg og Svein Inge Thime kunne konstatere at turneringa har ei positiv utvikling både fotballmessig og sosialt.

Arrangørane vil fram mot neste års turnering arbeide for å utvide turneringa med eit par engelske lag. Årets deltakarar stemte fram Leeds og Liverpool som ønskemotstandarar.

BRUFLAT MATCH CUP VART ARRANGERT

29 –30 JANUAR 1999

Om Match Cup

Match Cup er ei fotballturnering for «unge» gamle gubbar over 33 år, delt i to klassar. Ein klasse frå 33 til 40 år (oldboysklasse), og ein frå 40 år og eldre (veteranklasse). Bruflat Match var hovudsponsor i 1999.

Turneringa er eit tilbod til alle som har den mest aktive fotballkarrieren bak seg, men som framleis likar å spela fotball og halda seg litt i form. Samstundes er turneringa ein sosial møteplass for fotballspelarar på regionalt og nasjonalt nivå. Dei fleste av spelarane i denne turneringa har tidlegare spelt mot kvarandre i ulike seriar rundt om i landet. Alt frå elitenivå ned til våre lokale seriar i 6 – 7. divisjon. Turneringa har på kort tid etablert seg som den viktigaste nasjonale oldboys- og veteranfotballturneringa i Noreg. Planen og målet er å utvide turneringa til eit framtidig noregsmeisterskap i veteran- og oldboysfotball med kampar både i Lærdal og Årdal.

Kort historikk
Opphavsmann til turneringa er Roald Flodsand. I 1998 skipa Roald saman med andre til ein turnering for lokale lag i Tangenhallen i Årdal. Dette gav meirsmak. Ideen om å utvikla dette til noko meir var tend. Årdal kommune har to idrettshallar, og denne kapasiteten kunne utnyttast i turneringa. Roald tok kontakt med Dagfinn Hegg Lunde og Per Steinar Kvamme for å jobba fram ideen saman med Lærdal idrettslag v/leiar Viggo Hustad. Gruppa konkluderte med at tiltaket kunne være med å setja både idrettslaget og bygdene Lærdal og Årdal på fotballkartet på ein positiv måte.

Arbeid for å få til turneringa.
Arbeidet med å realisera turneringa i –99 tok til med innbydingar, kontakt med aktuelle lag og dommarar, organisering av transport, overnatting og økonomi. Det sportslege kom etter kvart på plass med mange tidlegare elitelag og –spelarar. Media med fjernsyn og aviser synte veksande interesse for turneringa. Me kunne no marknadsføre oss og støttespelarane på ein heilt annan måte. Ballen kunne sparkast igang.

Turneringa 29-30. Januar -99
36 lag deltok, fordelt på 20 veteran- og 16 oldboyslag. Mellom 350 og 400 spelarar var med. Mange av dei var tidlegare landslagsspelarar, – alle var samla for kampen om lærkula og møte med fotballvener frå heile landet. Det vart spelt over 80 kampar på desse to dagane.

Nokre av dei lokale laga, samt dei laga som kom tidlegast til Lærdal fredag, starta kampane samme ettermiddag. Det var aktivitet i Tangenhallen og Årdalshallen til ca. kl. 23.00 fredagskvelden. Dei fleste kampane skulle likevel avviklast frå laurdag morgon kl.0800 til siste finalen kl. 17.40 på ettermiddagen.

Elitelag som Brann,Viking, Fredrikstad, Moss, Sogndal, Start og Vålerenga var på plass. Namn som Per Egil Ahlsen, Svein Grøndalen, Svein Mathisen og Erik Foss. Erik slang med leppa før turneringa og fortalde til Aftenposten at dersom ikkje Vålerenga vann, skulle han gå tilbake til Oslo. Desse karane skulle no spela kampar mot lokale spelarar. Dei lokale heltane skulle no få prøva seg på «dei store». Dommarar som Svein Inge Time, Ivar Fredriksen, Frank Skadal og Reidar Bjørnestad skulle dømme kampar saman med lokale dommarar.

I Årdalshallen venta fjernsynsteam frå NRK. Turneringa fekk brei fjernsynsdekning i Sportsrevyen, Vestlandsrevyen, TV-Norge, TV Hordaland og TV Østfold. I hallane på Tangen og i Øvre vart det sveitta og teipa, kommentert og fleipa. Gjennom all humoren var det samstundes mykje prestisje og alvor, – kampane og turneringa skulle vinnast !

Arrangementsmessig gjekk det meste knirkefritt i Årdalshallen. I Tangenhallen måtte nokre startproblem laurdag morgon korrigerast, men kampprogrammet vart gjennomført som planlagt. Turneringa sin sportslege suksess toppa seg med reprise frå cupfinalen 1976 i veteranklassen, – Sogndal og Brann skulle møtast i finalen. Laga stilte med mange av spelarane som var med i finalen i 1976. Brann med spelarar som Neil McLeod, Ingvar Dalhaug og Bjørn Brant. Sogndal med Jon Navarsete, Svein Bakke og Knut Christiansen. Sogndal fekk ein lenge etterlengta revansj over Brann med siger 3 – 2 etter ein tett kamp med høgt tempo. Finalen i Oldboysklassen blei vunne av Høyanger.

Den sosiale delen.

Laga budde på Lærdal Hotel frå fredag til sundag. Fredag var det vitjing i Norsk Villakssenter for dei som ynskte det. Hotellet hadde ope hus med dans fredagskvelden, og det var nok ikkje alle som tenkte på at dei skulle spela kamp alt kl. 08.00 neste morgon….

Laurdagskveld var over 250 fotballveteranar samla til middag og fest med premieutdeling. Arrangøren fekk overrakt skriftleg helsing frå NFF v/ generalsekretær Trygve Bornø. Til dundrande applaus kom eit unisont krav frå spelarar og dommarar om at turneringa måtte bli eit årleg arrangement. «Mr. Fotball» i Sogndal, Rolf Navarsete, og fylkesordførar Knut Aarethun delte ut premiar til vinnande lag. I tillegg til vandrepokalen vart det gjeve eit bilete til kvar spelar på det vinnarlaget. Bilete var laga av Lærdalsmålaren Gjesme. Erik Foss frå Vålerenga fekk sjølvsagt fjellsko overlevert av festleiaren., til bruk på turen frå Lærdal til Oslo. Etter ein lang, velsmakande og humørfyllt middag, fortsette festen til langt ut i morgontimane. Både sportsleg, arrangementsmessig og ikkje minst sosialt kunne Bruflat Match Cup 1999 gå over i historia som ein knallsuksess.

Dato for neste turnering er fastsett til 28. og 29. januar 2000. Me gler oss allereie………

Ham-Kam slo Rosenborg 2- 0 !

Ham-Kam slo Rosenborg i finalen i innandørsturneringa i fotball for veteranar i Lærdal og Årdal 28. og 29. januar. Etter innleiande kampar, der lag som Vålerenga, Lillestrøm, Viking, Kongsvinger, Fredrikstad, Sogndal, Proffane (med mellom andre Anders Giske og Erik Solér) og Brann var slegne ut, sto kampen om den prestisjetunge finalesigeren i veteranklassa att. Både Rosenborg og Ham-Kam hadde hatt marginane på si side i innleiande rundar, men i finalen var det ingen tvil, Ham-Kam var best og vann ein fortent siger. Det måtte sjølv Sverre Brandhaug innrømme i si tale under banketten laurdag kveld. I oldboysklassa vann Norheimsund 4 – 2 mot den lokale favortitten Jotun frå Årdal.
(fullstendig resultatliste ligg ute på www.veterancup.no frå søndag kveld). 

Framtidig offisielt NM ?
Turneringa, som framstår som den viktigaste møtestaden for fotballspelarar i aldergruppa 33 til godt over femti år, vart arrangert for tredje året på rad, og arrangørane i Lærdal idrettslag fekk mykje ros for tiltaket i dei mange helsingstalane utover laurdagskvelden. Saman med fotballvener i Årdal har ein makta å få til eit godt opplegg, der både det sportslege og sosiale får innpass. Arrangørane ventar no på ei avgjerd i Norges Fotballforbund (www.fotball.no) i februar om arrangementet får status som offisielt NM i innandørsfotball for oldboys og veteran.

Henry Øberg æresmedlem i Sogndal
Geir Navarsete frå Sogn og Fjordane fotballkrets delte saman med ordførar i Lærdal, Olav Wendelbo, ut premiane til vinnarlaga og til lag nummer to og tre. I samband med premieutdelinga vart turneringas beste spelar i dei to klassane kåra. I oldboysklassa stakk Steinar Hopen, tidlegare Sogndalspelar som no spelar på Eikefjord, av med denne premien, medan Terje Kojedal frå Ham-Kam fekk denne utmerkinga i veteranklassa. I turneringa er også dommarane heilt sentrale i både det sportslege og sosiale. Finaledommar var Svein Inge Thime, og Ivar Fredriksen sto også for innslag av det underhaldande slaget. Under premieutdelinga fekk «far» – Henry Øberg – ei heilt spesiell utmerking. Han vart tildelt æresmedlemsskap i Sogndal for si lange teneste for fotballen. I si takketale sa han at han i yngre år hadde meint å bli prest, men at han hadde for kort hals til å bere krage. Til dundrande applaus takka forsamlinga for at han valde fotballen.

Her finn du lagoppstillingar til enkelte av laga som var med.