Stordal IL er eitt av laga som har vore med heilt frå starten og då med spelarar som har hatt gleda av å kunne delta i alle klassene heilt frå oldboys og fram til i dag. Når ein etterkvart då også har passert 60 med god margin, er det snart på sin plass å håpe at det vert oppretta endå ei ny klasse, nemleg 60+ 😊

Den som har vore med alle desse åra utanom det første, er Hallgeir Hove. Ein fødsel kom i vegen for deltaking i 1998, men etter det året har han fått med seg alle. Denne helga i Lærdal er eitt av dei store høgdepunkta kvart år og det er alltid like kjekt å kome tilbake og treffe, så vel dei trivelege og dyktige arrangørane som dei ein møter både på parketten og på banketten. Med tanke på alt det vi har opplevd saman – i løpet av alle desse åra – kan ein nesten sjå på dette som ein einaste stor familie.

I tillegg til alt det som har med det sosiale å gjere kan Stordal sjå tilbake på mange år der ein har hevda seg heilt i toppen og tidleg på 2000-talet opplevde laget også å gå heilt til topps, då laget slo Brann 2-1 i Oldboysklassa. Litt artig no, er det at to av dei som var med på å tape mot oss den gongen, nemleg brødrene Ludvigsen, er klare for deltaking att etter alle desse åra! 😊

I tillegg har det i løpet av alle desse åra blitt uforgløymelege møter med m.a. brødrene Brian og Michael Laudrup, der vi fort kunne ha leia med eit par mål i starten, men der vi etterkvart fekk ein bra leksjon i korleis fotball skal spelast…

Manchester United – med Andy Cole i spissen, derimot – vart lett match for oss. Det enda vel med 5-3 til slutt, om eg ikkje hugsar feil.

Det å sette Viking på plass (4-0) med Erik Thorstvedt i mål, var også stas. Det same å slå ut eit sterkt Strømmen-lag med Frode Grodås i spissen, to år på rad, like eins.

Eg var også så heldig å få vere med på det sokalla profflaget eit år og då m.a. i lag med ein annan som alltid er på plass når det er Veterancup, nemleg Trygve Johannesen. Sigeren over RBK smaka ekstra godt den gongen. Det er berre å spørre Trygve.. 😊

Det var ikkje minst også stas å få vere med å vinne veteranklassa i lag med Aafk, dette eine året då Stordal ikkje klarte stille lag.

No er det nok heller ikkje berre sjølve laget Stordal ein tenkjer på når det er snakk om Veterancup. Stordal er også møbelprodusenten som har bidratt med den flotte premien til turneringas beste spelar kvart år!

No kryssar vi fingrar for at vi alle skal klare å halde pandemien i sjakk og at arrangementet kan gå etter planen.

Vi gler oss i alle fall veldig!

Håvard Flo

Han er er ein av heltane som var med å slå Brasil 2-1 i VM 98. I slutten av januar møter Håvard att nokre av lagkompisane frå den store kampen på Stade de Velodrome i Marseille. No som spelar på det norske veteranlandslaget.

Flo spelte i alt 26 landskampar for Norge. Han har mange gode minner frå den tida. Likevel, det er ikkje til å stikke under ein stol att det heile toppa seg med den historiske seieren mot Brasil.

-Me sprang ut på stadion, og vart møtt av 75.000 tilskodar. Ein enorm stemning, eit voldsomt lurveleven. Nesten så ein måtte klype seg i armen for å skjønne kva ein verkeleg var med på, minnast 51 åringen som den gongen var proff i Werder Bremen. Han var veldig heldig som var med landslaget i Drilloepoken.

-Ja heilt klart, så var det jo kjekt at me var fire spelarar frå Sogn og Fjordane i VM-troppen, seier han. I tillegg til han sjølv var Frode Grodås, Jostein Flo og Tore Andre Flo på plass i Frankrike.

Respekt

Håvard Flo gledar seg til Veterancupen, og nemner dugnadsarbeidet som vert lagt ned både før og i sjølv turneringa.

-Eg må berre gje stor honnør til innsatsen Roald og resten av gjengen legg ned for legge alt til rette for oss. Det har eg stor respekt for, seier Håvard.

No ser han fram til å møte tidlegare kompisar frå den aktive fotballkarrieren. Det sosiale aspektet der ein kan mimre og dele historiar frå tidlegare er veldig kjekt.

Bra fysisk

Korleis er formen?

-Den har vel vore bedre, men eg prøver å halde meg i nokolunde bra fysisk form, seier Håvard. Reint fotballmessig merkar han nok at tida har  gått framover.

-Hovudet og viljen er nok til stades, men touch og teknikk sat nok bedre før. Konkurranseinstinkt og innsats kjem fort når ein snører på seg skoa og entrar parketten. Me går sjølvsagt på bana for å vinne. Det er ikkje snakk om å gje seg uten kamp, seier Håvard Flo. Ambisjonen er å bli betre enn i 2020 då dei tapte finalen.

– Eg reknar med at trenaren vår Harald Aabrekk har lagt ein god plan, avsluttar Håvard Flo med eit lurt smil.

Steinar Kvigne

Det ligg i botn når oldgirls laget til Lærdal går på bana.

– I 2020 skåra me eitt mål, i år bør me i alle fall doble dette talet, seier Iris Blaaflat.

Dei har aldri vunne ein kamp i Veterancupen, men her er det mottoet tap og vinn med same sinn som er i fokus.

– Nei, me har ikkje fått nokon seier på bana, men festen vinn me uansett. Det gjer me jo alltid, seier Iris, primus motor for den humørfylte damegjengen.

Unngå skadar

I haust har dei trent ute to gonger i veka, men no har dei trekt inn i hallen. Og det aller viktigaste fram mot turneringa er å unngå skadar.

– Ja det er det absolutt ikkje rom for. På treningane er det alltid bånn gass, og det har ført til både ribbeinsbrot og ankelskadar. Eg trur nok mykje av skadeplagene skuldast manglande teknikk og fart, fortel Iris. Det handlar i alle fall ikkje om mangel på innsats.

– På trening er det ikkje fred å få, full fart heile tida. Her ligg me langt framfor karane, dei står meir i ro og trillar ballen til kvarandre. Me er nok litt grovare, seier Iris med eit smil.

At lærdalsdamene vil setje sitt preg på turneringa både sportsleg og sosialt er det i alle fall god grunn til å tru.

Steinar Kvigne
Foto: Privat

Mykje har skjedd sidan første turnering med omsyn til resultatservice og live-oppdateringar på nett. I år tek vi det eit stort steg vidare. Eit utval kampar frå innleiande rundar på alle arenaer (Årdal, Lærdal og Aurland), og heile finalespelet vert strøyma «live». Så om du sit på Klaksvik, ættar etter Ingolf Arnarsson, eller normal følgjer med på Veikkausliiga kan du sjå kampane «live» via YouTube.

«Vi legg opp til at fotballinteresserte over heile verda kan følgje med, men vi reknar sjølvsagt med at det er dei mest ihuga supporterane knytt til dei deltakande landslaga som vil vere ivrigast, seier general Flodsand».

Det er eit stort apparat som skal til, men om vi skulle gjort dette for ti år sidan ville vi brukt eit «halvt TV2-team». Vi er så heldige at Høgskulen på Vestlandet (HVL) vil samarbeide med oss. Dei vil prøve ut sending frå ulike stader – med TV-kvalitet – i same sending. Og lokal ungdom får høve til å lære litt «TV-produksjon».

«HVL skal vere tett på regionen, og denne teknologien som vi nettopp har fått på plass ønsker vi å bruke i mange samanhengar. Dette ser vi fram til å vere med på», seier Brian Holmedal, prosjektleiar ved Medielab i HVL.

Reint teknisk vert det filma i kvar hall. Desse signala vert sende til ein felles virtuell miksepult. Der vil kampbilete og intervjusituasjonar bli sende ut på ein YouTube-kanal, etter at reklameplakatar, lagoppstillingar og mykje anna er lagt til sjølve biletstraumen. Det er ikkje mange sekunda forseinking frå eit spark på ballen, til sjåaren på Søvang ser kva som skjer.

«For turneringa gir dette ein ny dimensjon, både med omsyn til service og til marknadsføring. For landslaga kjem vi til å tilby sponsorplass minuttet før kampstart, slik at dei kan hente inn midlar frå deira nasjonale sponsorar, og slik finansiere si eiga deltaking, eller gi midlane til gode formål lokalt», seier Flodsand.

Så det er berre å følgje med på heimesida til turneringa på kampdagane – der vi de finne rett lenke til sendingane.

Frå 1. desember til og med julaftan vil de finna kalenderluker her på heimesida. Quizmaster Lars vil kvar dag presentera oppgåver om fotball eller anna som kan knytast til Veterancupen. I tillegg kan det koma spørsmål med andre tema. Det blir premiering samanlagt samt trekt ut deltakarpremiar.

Vinnaren/-ane vert presentert og premiert på banketten.

Me håpar på god deltaking i denne prestisjetunge konkurransen!

Lars E.