Sogn Sparebank – ein solid støttespelar

Lokalbanken med kontor i Lærdal, Aurland, Årdal, Sogndal, Vik og Bergen held fram som hovudsponsor for Veterancupen.

Ragnhild Skahjem Tofastrud, kva er viktigaste grunn til dette, og at de gjennom året støttar svært mange andre tiltak i banken sitt nedslagsfelt?

-Det er rett og slett fordi me vil bidra til at Sogn vert ein endå betre plass å bu og vekse opp i. Då er det behov for kjekke møteplassar og aktivitetar, slik som Veterancup. Det er ei tradisjonsrik turnering som bidreg til både god folkehelse, lagspel og er ein sosial møteplass både for spelarar og publikum. I tillegg er det positivt for lokalt næringsliv elles denne helga, seier Ragnhild. Og legg til:

-Du har rett i at me støttar svært mange tiltak i lokalsamfunna våre, det strekker seg frå bidrag til 17.mai feiringar, oppussing av bygdehus, filmprosjekt, kunstutstillingar, romjulskino, festivalar, idrettslag – eg kunne ha ramsa opp heilt til i morgon. Mangfaldet er stort – saman med eldsjeler får me til mykje godt i lag.

Fekk du med deg nokre av kampane i fjor?

-Ja, det gjorde eg. Eg var i Lærdal og fekk med meg fleire av kampane, også når Ukraina spelte. Det var skikkeleg god stemning, mykje folk og mykje godt i kiosken. Arrangørane gjorde ein kjempeinnsats.

Cupen i fjor bar sterkt preg av situasjon i Ukraina. Mellom anna med ein gripande konsert i kulturhuset. Kva inntrykk sat du att med?

 -Det er klart at det var veldig spesielt at Ukraina sitt landslag kom til Lærdal for å spele fotball når landet er i krig. Støttekonserten var veldig flott og verdig med fantastiske ukrainske musikarar. Innsamlingsaksjonen «Fotball for Ukraina» var eit godt initiativ med støtte frå fotball-Noreg. Eg sit ikkje minst att med sterke historier, at fotballresultata ikkje er det avgjerande, men at den viktigaste vegen til målet er gjennom venskap og gode relasjonar på tvers av landegrenser.

-Eg håpar i år som i fjor at publikum møter opp i hopetal, og at det vert mange gode opplevingar både på og utanfor bana. Lukke til med Veterancup, seier Ragnhild Skahjem Tofastrud.