Frithjof Wilborn leiar banketten

Tidlegare Brann og Strømsgodset-spelar Frithjof Wilborn er årets toastmaster under banketten på Lærdal Hotell laurdagskvelden.

Wilborn spelte 72 kampar for Strømsgodset og 29 kampar for Brann i åra mellom 1983 og 1988. Han var ein kjapp ving som banka inn 31 mål for Strømsgodset og tre for Brann før han gav seg. Fram til januar 2008 jobba Wilborn i TV2.

Under Veterancup skal han gjenforeinast med sin gamle klubbkollega i Brann, Per Egil Ahlsen. Begge skal spele for Fredrikstad i Superveteran-klassa.

-Eg ser definitivt meir fram til banketten enn å spele fotball. Fysikken som krevst til å gjere alle dei tinga som eg gjorde før, er ikkje der lenger. Så strekken kjem vel, flirer Wilborn på telefon med Veterancup.

Wilborn deltok på oldboys-laget til Brann under ein turnering i Vestlandshallen for nokre år sidan. Strekken kom raskt alt i fyrste kampen. Men sidan laget mangla keeper, fekk han spele likevel.

-Det vart svært underhaldande. Det gjekk eit forventningsfullt brus gjennom publikum kvar gong motstandarlaget gjekk i angrep, flirer Wilborn, som gledar seg stort til å kome til Lærdal.