Velkomne til årets veterancup

42 lag er påmeldt til årets veterancup. Primus motor Roald Flodsand ynskjer alle velkomne til knallharde kampar om lærkula, og seier det meste no er på plass.

Kampane går som tidlegare år i hallane på Årdalstangen og i Øvre Årdal, men neste år ser Flodsand fram til at ein del av kampane vert avvikla i den nye Lærdalshallen.

-Det blir stort for oss å ha deler av arrangementet i ny idrettshall i Lærdal, ikkje minst reint praktisk. Me vil likevel vere avhengig av å ha eit godt samarbeid med idrettslaga i Årdal, både når det gjeld bruk av idrettshallane og ved gjennomføringa av turneringa. Den innsatsen og velvilje tillitsvalte i nabokommunen har synt er berre heilt fantastisk, seier Roald Flodsand. Han vil og understreke at den nye idrettshallen i Lærdal ikkje blir bygt for veterancupen, dei vil sjølvsagt betale leige for å disponere hallen til sitt arrangement.

Over same lest

Årets turnering vert avvikla over same lest som tidlegare. 24 lag er påmeldt i veteranklassen, 12 i oldgirls og 6 lag i klassen for oldboys.

-Eg vil spesielt framheve dameklassen som har hatt store auke i talet på lag. Dette mykje takka vere Aud Inger Sviggum Tangen i Kaupanger, som har stått veldig på for å få med fleire. Ikkje minst blir det artig å sjå korleis Trondheims Ørn sine damer vil hevde seg i turneringa, seier Flodsand. Nytt av året er og at Lærdal stiller med damelag. Vålerenga og Rosenborg har vore faste innslag i veteranklassen, men stiller av ulike årsaker ikkje denne gongen.

-Eg har likevel fått melding om at dei truleg kjem sterkt tilbake neste år, fortel Flodsand.

Øberg på plass

Som i fjor kjem også veterandommaren Henry Øberg til årets turnering, ikkje som domar men som invitert tilskodar. Derimot vil tidlegare eliteseriedommar Rolf Nyhus bli å sjå i svart dommardrakt både fredag og laurdag.

-Me håpar elles på stor oppslutnad frå publikum, og dersom nokon er i tvil. Overskotet går tilbake til aldersfastlagd fotball i Lærdal, Jotun og Årdalstangen, seier Roald Flodsand.